संयुक्त मधेसी मोर्चाले गरेको अनिश्चितकालीन बन्दले मधेसको जनजीवन प्रभावित भएको छ ।

2064-2 फागुन

संयुक्त मधेसी मोर्चाले गरेको अनिश्चितकालीन बन्दले मधेसको जनजीवन प्रभावित भएको छ । मधेसी जनअधिकार फोरम, सद्भावना महतो समूह र तराइ-मधेस लोकतान्त्रिक पार्टीले बुधबारदेखि मधेस बन्द आह्वान गरेका थिए ।

बन्दले बुधबार वीरगन्ज उपमहानगरपालिका ठप्प रह्यो । वीरगन्जका बजार, कलकारखाना, उद्योग, व्यापारिक प्रतिष्ठान, शैक्षिक संस्था तथा यातायात पूर्णरूपमा बन्द रहे । वीरगन्जबाट चल्ने लामो तथा छोटो दूरीका सम्पूर्ण सवारी-साधन ठप्प रहेका छन् भने विवाह, अस्पतालका सवारी-साधन भने फाट्टफुट्ट चलेका थिए ।

यसैगरी मधेस बन्दका कारण बर्दियाको जनजीवन पनि प्रभावित बनेको छ । बन्दकर्ताले यातायात, शिक्षण-संस्था, कलकारखाना तथा बजार बन्द गराएका छन् । संयुक्त लोकतान्त्रिक मधेसी मोर्चामा संगठित दलले अनिश्चितकालीन बन्दको घोषणा गरेका हुन् । बिहानैदेखि सदरमुकाम गुलरिया बन्द रह्यो । प्रशासनले बर्दियाको सुरक्षा कडा पारेको छ । यहाँका सरकारी कार्यालय भने खुलेका थिए ।

यस्तै बन्दको पहिलो दिन बुधबार पूवाञ्चलको जनजीवन पूर्णरूपमा प्रभावित भएको छ । हडतालका कारण पूर्वाञ्चलमा सवारी-साधन चल्न सकेनन् । पूर्वाञ्चलका बजार, औद्योगिक क्षेत्र, शैक्षिक संस्था पनि ठप्प भएका छन् । सुनसरीको इटहरी, धरान र सदरमुकाम इनरुवा पूर्ण प्रभावित रहे । बन्दका कारण पूर्वी पहाडी जिल्लामा पनि प्रभाव परेको छ । पूर्वी पहाडबाट तराइ र पहाडसम्म पुग्ने यात्रुहरू सवारी-साधनकोे अभावका कारण हिँडेरै गन्तव्यतिर लागेका छन् ।

संयुक्त मधेसी मोर्चाले आयोजना गरेको बन्दले रुपन्देही सामान्य प्रभावित भएको छ । बन्दका कारण मर्चवार, लुम्बिनी, र धकधईलगायतका क्षेत्र प्रभावित भए । बन्दले भैरहवाको गल्लामन्डी, बैंकरोड क्षेत्रका पसल बन्द थिए भने बर्मेली टोल र अञ्चलपुर क्षेत्रमा पसल खुलेका थिए ।

मोर्चाका कार्यकर्ताले रुपन्देहीका दुइवटा उद्योगमा तोडफोड गरेका छन् । उनीहरूले लुम्बिनी-भैरहवा सडकखण्डमा रहेको जगदम्बा सेन्थेटिक्स र रिलायन्स मिलमा तोडफोड गरेका हुन् । प्रहरीका अनुसार बन्द आह्वानकर्ताले जगदम्बाका आठ र रिलायन्स सिमेन्ट मिलका चारवटा भ\mयालका सिसा तोडफोड गरेका छन् । बन्दले खासगरी कपिलवस्तुको तौलिहवा, कृष्णनगर तथा नवलपरासीको परासी र दक्षिणी क्षेत्र बढी प्रभावित भएका छन् ।

बन्दको प्रभाव र्सलाहीमा पनि परेको छ । बन्दका कारण सदरमुकाम मलंगवाका बजार बन्द रहनुका साथै छोटो तथा लामो दूरीमा चल्ने सवारी-साधन चल्न सकेका छैनन् । पूर्वँ-पश्चिम महेन्द्र राजमार्गको नवलपुरमा सयौं यात्रु अलपत्र परेका छन् । नवलपुरदेखि सदरमुकाम मलंगवासम्म बन्दकर्ताले ठाउँ- ठाउँमा टायर बालेर बाटो अवरोध गरेका छन् ।